استمتع بحياتك

لما تيجى مثلا تلعبى مع ولادك لازم تلعبى وانتى فرحانة ومبسوطة (على فكرة ممكن فى الاول تمثلى انك مبسوطة بس هتلاقى نفسك بعد شوية مبسوطة فعلا)..

ولازم وانت بتشتغل تحب شغلك حتى لو مش بتحبه ومش طايقه ولا طايق مديرك اللى مطلع عينك..لكن لازم تحبه (انت مفيش قدامك غير انك تحبه والا هتخبط دماغك فى الحيط)..

وماتنساش ان فيه ناس بتحسدك على الشغل اللى مش عاجبك ده..

وحتى الصلاة.. ماينفعش تصلى وانت زهقان ولا مستعجل وتبقى حاسس انها واجب عليك (صلى بالراحة هوا فيه حد بيجرى وراك) !!و لعلمك كل ماهتحب الصلاة وتؤديها بحب وخشوع ..كل ماهتحس براحة جامدة اوى بعدها..

وكمان الاكل لازم نستمتع واحنا بنعمله و نستمتع اكتر واحنا بناكله..(مش ناكل كده ونبلع وخلاص) و ممكن بدل ما تحطى فى البيتزا طماطم وفلفل وبسطرمة..تحطى بدالهم شوية حب على شوية حنان وترشى معلقتين اشواق وتغنى وتفرحى اوى وانتى بتعمليها..وهتلاقى اللى بياكل هيحس بمشاعرك دى وهتوصله بعد اول قطمة وهتشوفيه مبسوط اوى وبياكل بمزاج..

اصل ماينفعش كل حاجة نعملها واحنا مستعجلين او نعملها واحنا زهقانين..والا مش هننجح فى اى حاجة بنعملها..اصل كده كده الحياة مش وردية ومش كل حاجة هتقابلنا فى حياتنا هتسعدنا لان فيه ظروف كتير ومواقف بتتفرض علينا. وفيه التزمات ومشاغل كتير ورانا..

يبقى بدل مانستحملها واحنا زهقانين وبنندب حظنا..نستحملها احسن واحنا فرحانين ومتفائلين..لان كده كده لازم نستحملها..(باريت نحط اعصابنا فى التلاجة شوية).وعلى فكرة الحاجة اللى بنعملها بحب ..لازم ننجح فيها…

يعنى لعبك مع ولادك وانتى مبسوطة اوى (حتى لو كنتى هلكانة من كتر التعب) هيخليكى تنجحى فى تربية ولادك وهتكسبى حبهم ليكى..وطبيخك بمزاج وحب (حتى لو كنتى تعبتى اوى من وقفة المطبخ) هيخليكى تنجحى فى عمل البيتزا وكل الاصناف التانية وهتبقى شيف جامد جدا..

ومش هتخلى جوزك ياكل من برة ..وشغلك لما تحبيه ( حتى لو مديرتك رذلة اوى وملهاش حل..يا ستى تخيلى انها شبه شادية فى مراتى مدير عام وانتى هتحبيها ع الاخر…لكن بالنسبة للرجالة بلاش يتخيلوا كده بدل ما يفتكروها شادية وياخدوها بالحضن تقوم لسعاهم على قفاهم علطول)

لو فعلا حبيتى شغلك كده هتنجحى فيه وهتفرضى نجاحك على فريق العمل كله بما فيهم مديرك ده غير انك ممكن تنقلى بعد كده لشغل تانى بتحبيه (حب ماتعمل حتى تعمل ماتحب)..

وطبعا الصلاة لما تصليها بمتعة وحب وخشوع(حتى لو تعبانة و عايزة تنامى وكسلانة)..هننجحى فى اهم اختبار وهوا انك تنتصرى على الشيطان وترضى ربنا سبحانه وتعالى وده هوا اهم نجاح فى الحياة كلها..وزى ما ربنا خلق الدنيا فى ست ايام..احنا كمان هنمشى على مهلنا بس نمشى صح(ومش معنى ان العربية اللى قدامى سبقتنى ان عربيتى مش هتوصل).. لكن انشغالى بالعربيات اللى سبقتنى هوا ده اللى ممكن يعطلنى ..

وفى الاخر كلنا هنوصل..يبقى على الاقل نستمتع بالطريق اللى احنا ماشيينه لانه الطريق ممكن يكون طويل وصعب..!!؟؟

المصدر:رجاله واكتر